છેલ્લા દસ મહિનાથી એસી લોકલનો નકલી પાસ બનાવી પ્રવાસ કરતો મીરારોડનો સોફ્ટવેર એન્જિનિયર પકડાયો છે. પશ્ચિમ રેલવેની વિજિલન્સ ટીમની બે મહિલા ટીસીઓને શંકા ગયા બાદ યુવકની પોલ ખુલી હતી.
પશ્ચિમ રેલવેની વિજિલન્સ ટીમે ૨૧ વર્ષના અમન નકરાણીને સોમવારે ચર્ચગેટથી બોરીવલી દરમિયાન એસી લોકલમાં પ્રવાસ કરતી વખતે પકડયો હતો. તેની પાસેથી ૪,૮૦૦ રૃપિયાનો દાદર – મીરા રોડ વચ્ચે એસી લોકલનો ત્રણ મહિનાનો બનાવટી યુટીએસ પાસ જપ્ત કરવામાં આવ્યો છે. તેના આઈફોનમાંથી અન્ય ૧૧ યુટીએસ પાસ પણ જપ્ત કરાયા છે. બનાવટી દસ્તાવેજો બતાવી સરકાર સાથે છેતરપિંડી કરવાના કેસમાં અમનને આગળની કાર્યવાહી માટે અંધેરી રેલવે પોલીસના તાબામાં સોંપવામાં આવ્યો છે અને આગળની તપાસ ચાલુ છે.
અમનને જીલ અને સ્નેહલ.પી. નામની બે મહિલા ટીસીએ પકડયો હોવા બદલ આ બે મહિલા ટીસીઓની પ્રશંસા અધિકારીઓએ કરી હતી. કારણ કે નકલી પાસને આધારે આટલા દિવસ એસી લોકલમાં આરોપી પ્રવાસ કરવા છતાં પણ અન્ય કોઈ ટી. સીના ધ્યાનમાં આ વાત આવી ન હતી. જ્યારે કે આ મહિલા ટીસીઓની દક્ષતાને કારણે આરોપી જાળમાં ફસાઈ ગયો હતો.
અમન નાકરાણી મૂળ સુરતનો રહેવાસી છે. હાલ તે મીરા રોડમાં વસવાટ કરે છે. તેણે સોફ્ટવેરનો ઉપયોગ કરીને યુટીએસની સિસ્ટમમાં કંઈક ફેરફાર કરી રેલવે પાસ તૈયાર કર્યો હોવાનું કહેવાય છે. ત્યારબાદ તેણે પોતાના સગા-સંબંધીઓ માટે પણ નકલી પાસ બનાવીને વેંચવાની શરૃઆત કરી હોવાનો ખુલાસો થયો છે. અમન આ બનાવટી એસી લોકલના પાસ નો ઉપયોગ સપ્ટેમ્બર ૨૦૨૨થી કરી રહ્યો હતો. જેને કારણે પશ્ચિમ રેલવેને ૪૮,૦૦૦ રૃપિયાનું નુકસાન થયું છે. અત્યાર સુધી તેણે આવા ૧૧ નકલી પાસ મિત્રોને અને સ્વજનોને આપ્યા હોવાનું સામે આવ્યું છે. આ કૃત્ય કરવા બદલ યુવક વિરુદ્ધ રેલવે પોલીસે કેસ દાખલ કર્યો છે. પશ્ચિમ રેલવેની દક્ષતા ટીમની બે મહિલાઓને શંકા થવાથી આ યુવક તો પકડાયો પરંતુ આ રીતે બનાવટી ઈ-પાસ ઓળખવાની સિસ્ટમ રેલવે પાસે છે કે નહીં? તેવો પ્રશ્ન ઉભો થયો છે.
ગુર્જરભૂમિની ફ્રી ઈ-કોપી દર રવિવારે રેગ્યુલર મેળવવા નીચે આપેલ લીંક પર ક્લિક કરો અને જોડાઓ ગુર્જરભૂમિના whatsapp કમ્યુનિટીમાં. Join Gurjarbhoomi’s What’s app Community for regular updates by clicking d link given below… https://chat.whatsapp.com/Dlp5GlYBsz4I3eX56yFiSM