મહારાષ્ટ્ર ભાડા નિયંત્રણ અધિનિયમ (Maharashtra Rent Control Act, 1999) હેઠળ મુંબઈ પોલીસે એક ઐતિહાસિક અને પ્રથમ કહી શકાય તેવી કાર્યવાહી હાથ ધરી છે. સાંતાક્રુઝ (પૂર્વ) વિસ્તારમાં આવેલા એક ફ્લેટનો લીવ એન્ડ લાયસન્સ (Leave and Licence) કરાર પૂર્ણ થઈ ગયો હોવા છતાં કબજો ન છોડનારા રહેવાસીઓને ડેપ્યુટી કમિશનર ઓફ પોલીસ (DCP) દ્વારા તાત્કાલિક અસરથી ફ્લેટ ખાલી કરવાનો કડક આદેશ આપવામાં આવ્યો છે. આ ઉપરાંત, જ્યાં સુધી મૂળ માલિકોને ફ્લેટનો કબજો પરત ન સોંપાય ત્યાં સુધી દર મહિને નક્કી કરાયેલી ફી કરતા બમણું વળતર ચૂકવવાનું પણ ફરમાન કરવામાં આવ્યું છે.
શું છે સમગ્ર મામલો?
બાંદ્રા (પૂર્વ) ખાતે રહેતા પ્રકાશ દિગંબર દેવધર અને તેમના પત્ની પ્રભા પ્રકાશ દેવધરની માલિકીનો એક ફ્લેટ (C/408) સાંતાક્રુઝ (પૂર્વ) ના નેહરુ રોડ સ્થિત ‘જય કો-ઓપરેટિવ હાઉસિંગ સોસાયટી લિમિટેડ’માં આવેલો છે. આ ફ્લેટ માટે 36 મહિનાનો રજિસ્ટર્ડ લીવ એન્ડ લાયસન્સ કરાર કરવામાં આવ્યો હતો.
જોકે, કરારની મુદત પૂરી થઈ ગઈ હોવા છતાં ફ્લેટમાં રહેતા કબજેદારો દ્વારા મકાન ખાલી કરવામાં આવતું ન હતું. આખરે કંટાળીને મકાનમાલિક દંપતીએ 16 ઓક્ટોબર, 2026ના રોજ પશ્ચિમ ક્ષેત્ર-1 (Western Region-I) ના DCP અને સક્ષમ સત્તાધિકારી (Competent Authority) સમક્ષ આ અંગે ફરિયાદ દાખલ કરી ન્યાયની માંગણી કરી હતી.
સક્ષમ સત્તાધિકારી તરીકે DCPની નિમણૂક અને કડક આદેશ
મહારાષ્ટ્ર સરકારના ગૃહ નિર્માણ વિભાગે 31 જુલાઈ, 2026ના રોજ એક મહત્વપૂર્ણ જાહેરનામું બહાર પાડ્યું હતું. મહારાષ્ટ્ર રેન્ટ કંટ્રોલ એક્ટ, 1999ની કલમ 40 હેઠળ મુંબઈ પોલીસ કમિશનરેટ હેઠળના તમામ 15 ઝોનના DCP ને તેમના કાર્યક્ષેત્રમાં ‘સક્ષમ સત્તાધિકારી’ (Competent Authority) તરીકે નિયુક્ત કરવામાં આવ્યા છે.
આ નવી સત્તાનો ઉપયોગ કરીને DCP દ્વારા મુંબઈ પોલીસનો આ પ્રથમ કેસ ચલાવવામાં આવ્યો હતો. સુનાવણી બાદ સત્તાધિકારીએ નીચે મુજબના મહત્વપૂર્ણ આદેશો આપ્યા છે:
- તાત્કાલિક કબજો સોંપવો: ફ્લેટના કબજેદારોએ તાત્કાલિક ધોરણે જગ્યા ખાલી કરીને શાંતિપૂર્ણ રીતે મૂળ માલિકોને તેનો કબજો સોંપી દેવો.
- બમણું વળતર ચૂકવવું: કરાર પૂર્ણ થયા બાદ ગેરકાયદેસર રીતે કબજો જાળવી રાખવા બદલ, 1 સપ્ટેમ્બર, 2026થી લઈને જ્યાં સુધી ફ્લેટનો પ્રત્યક્ષ કબજો માલિકોને પરત ન મળે ત્યાં સુધી દર મહિને લાયસન્સ ફીની બમણી રકમ વળતર પેટે ચૂકવવી પડશે.
મકાનમાલિકો માટે મોટી રાહત
સામાન્ય રીતે ભાડૂઆત અને મકાનમાલિક વચ્ચેના વિવાદો કોર્ટમાં વર્ષો સુધી ચાલતા હોય છે, જેના કારણે મિલકતધારકોને ભારે હાલાકી ભોગવવી પડે છે. પરંતુ રાજ્ય સરકારના નિર્ણય બાદ હવે ઝોનલ DCP ને સીધી સત્તા મળતા આવા કેસોનો ઝડપી નિકાલ આવશે. મુંબઈ પોલીસની આ પ્રથમ કાર્યવાહીથી ગેરકાયદેસર રીતે મકાન પચાવી પાડનારા તત્વોમાં ફફડાટ વ્યાપી ગયો છે અને પ્રમાણિક મકાનમાલિકોને મોટી કાયદાકીય રાહત મળી છે.
Join Gurjarbhoomi Whats App Community by clicking the link follows… https://chat.whatsapp.com/InDRknMaSTQCOE24MRAoPg
For more details… Contact 9322529232 / 9324483455
Follow us on Instagram & Facebook by clicking the logo below…
About the Author
