એશિયાના બીજા સૌથી ધનિક ગૌતમ અદાણીનું આરોગ્ય ક્ષેત્રે મોટું રોકાણ, મેયો ક્લિનિક સાથે ભાગીદારી, વિશ્વ કક્ષાની હોસ્પિટલો અને મેડિકલ કોલેજોની સ્થાપના.
દેશના અગ્રણી ઉદ્યોગપતિ ગૌતમ અદાણીએ આરોગ્ય અને શિક્ષણ ક્ષેત્રે મોટું રોકાણ કરવાની જાહેરાત કરી છે. અદાણી ગ્રુપે અમદાવાદ અને મુંબઈમાં અદાણી હેલ્થ સિટી શરૂ કરવાની સાથે બે મેડિકલ કોલેજો ખોલવાની જાહેરાત કરી છે. આ પ્રોજેક્ટ માટે અદાણી ગ્રુપે અમેરિકાના મેયો ક્લિનિક સાથે ભાગીદારી કરી છે અને પ્રારંભિક તબક્કામાં રૂ. 6,000 કરોડથી વધુનું દાન આપવાની જાહેરાત કરવામાં આવી છે.
Proud to launch Adani Health City in partnership with Mayo Clinic, pioneering world-class medical research, affordable healthcare & education. Starting with two 1000-bed hospitals and medical colleges in Ahmedabad & Mumbai, we are on a mission to bring cutting-edge medical… pic.twitter.com/KQ6Xoql3FH
— Gautam Adani (@gautam_adani) February 10, 2025
અદાણી ગ્રુપ દ્વારા શરૂ કરવામાં આવનાર અદાણી હેલ્થ સિટીમાં વિશ્વ કક્ષાની તબીબી સુવિધાઓ ઉપલબ્ધ હશે. આ ઉપરાંત, મુંબઈ અને અમદાવાદમાં ખોલવામાં આવનાર મેડિકલ કોલેજોમાં વિદ્યાર્થીઓ માટે ઉચ્ચ ગુણવત્તાયુક્ત તબીબી શિક્ષણની વ્યવસ્થા કરવામાં આવશે. દરેક મેડિકલ કોલેજમાં 1,000 બેડની સુવિધા હશે, જેમાં વાર્ષિક ધોરણે 150 ગ્રેજ્યુએટ, 80થી વધુ રેસિડેન્ટ ડોક્ટર્સ અને 40થી વધુ ફેલોને પ્રવેશ આપવામાં આવશે.
અદાણી ગ્રુપે આ બે હોસ્પિટલોમાં સંસ્થાકીય ઉદ્દેશ્યો અને ક્લિનિકલ પ્રેક્ટિસ અંગે વ્યૂહાત્મક સલાહ આપવા માટે વિશ્વ વિખ્યાત મેયો ક્લિનિક ગ્લોબલ કન્સલ્ટિંગ (મેયો ક્લિનિક)ની નિમણૂક કરી છે. મેયો ક્લિનિક ડિજિટલ ટેક્નોલોજી અને આઇટીના ઉપયોગ અને આરોગ્ય સેવાની ગુણવત્તા પર ધ્યાન કેન્દ્રિત કરીને ટેક્નોલોજીના સંકલન પર પણ માર્ગદર્શન આપશે.
ગૌતમ અદાણીએ આ પ્રસંગે જણાવ્યું હતું કે, “બે વર્ષ પહેલાં મારા 60માં જન્મદિવસે મારા પરિવારે આરોગ્ય સેવાઓ, શિક્ષણ અને કૌશલ્ય વિકાસમાં સુધારો કરવા માટે રૂ. 60,000 કરોડનું વચન આપ્યું હતું. અદાણી હેલ્થ સિટી આ દિશામાં પ્રથમ પગલું છે. અમારો ઉદ્દેશ્ય ભારતીય સમાજના દરેક વર્ગના લોકોને સસ્તું અને વિશ્વ કક્ષાનું આરોગ્ય સંભાળ પ્રદાન કરવાનો છે.” તેમણે વધુમાં કહ્યું કે, “મેયો ક્લિનિક સાથેની ભાગીદારી ભારતમાં આરોગ્યસંભાળના ધોરણોને વધારવામાં મદદ કરશે.
માહિતી અનુસાર, અદાણી ગ્રુપ આ પ્રોજેક્ટમાં પ્રારંભિક તબક્કામાં $1.6 બિલિયન એટલે કે અંદાજે રૂ. 13,000 કરોડનું રોકાણ કરવાની યોજના ધરાવે છે, જેમાં બે હેલ્થ કેમ્પસનું બાંધકામ પણ સામેલ છે. અદાણી ગ્રુપ ભવિષ્યમાં ભારતભરના શહેરો અને નગરોમાં આવા વધુ અદાણી હેલ્થ સિટી સ્થાપવાની યોજના ધરાવે છે.
અદાણી ગ્રુપનો આ પ્રોજેક્ટ ભારતમાં આરોગ્ય અને શિક્ષણ ક્ષેત્રે એક ક્રાંતિકારી પગલું સાબિત થઈ શકે છે. આનાથી સામાન્ય લોકોને સસ્તી અને ગુણવત્તાયુક્ત તબીબી સેવાઓ ઉપલબ્ધ થશે, તેમજ દેશમાં તબીબી શિક્ષણને પણ નવી દિશા મળશે. અદાણી અને મેયો ક્લિનિકની ભાગીદારી ભારતીય આરોગ્ય ક્ષેત્ર માટે એક સીમાચિહ્નરૂપ ઘટના છે.’
Join Gurjarbhoomi Group & get Daily Updates, News & Many more…
ગુર્જરભૂમિ ન્યૂઝપેપરની ફ્રી ઈ-કોપી દર રવિવારે રેગ્યુલર મેળવવા નીચે આપેલ લીંક પર ક્લિક કરો અને જોડાઓ ગુર્જરભૂમિના whatsapp કમ્યુનિટીમાં અને દરરોજ મેળવો તાજા સમાચાર અને બીજું ઘણું બધું
https://chat.whatsapp.com/IiegbNAZmfo4K6mATvrZP8
