મુલુંડમા રહેતી કચ્છી મહિલા ડૉક્ટર તેની બહેન જે ઉત્તરાખંડમાં છે તેને વાપરવા માટે કાર મોકલવા માગતી હતી અને એ માટે તેણે મૂવર્સ ઍન્ડ પૅકર્સનો કૉન્ટેક્ટ કર્યો હતો. તેમણે ઉત્તરાખંડ પહોંચાડવાના નામે કાર તો લીધી હતી, પણ એના સર્વિસ ચાર્જ તરીકે પૈસા પણ લીધા હતા. અંતે કેટલાક દિવસો સુધી કાર ડિલિવર ન થતાં ફરિયાદીએ મૂવર્સ ઍન્ડ પૅકર્સનો ફરીથી સંપર્ક કર્યો ત્યારે પોતાની સાથે છેતરપિંડી થઈ હોવાનું જણાયું હતું. અંતે આ ઘટનાની ફરિયાદ મુલુંડ પોલીસ-સ્ટેશનમાં કરવામાં આવી હતી.
મુલુંડ-વેસ્ટના પંડિત મદન મોહન માલવિયા રોડ પર ટેલિફોન એક્સચેન્જ નજીક એક સોસાયટીમાં રહેતાં અને બી. પી. રોડ પર ડેન્ટલ ક્લિનિક ધરાવતાં ૩૮ વર્ષનાં ડૉ. રુચિ ભાનુશાલીએ કરેલી ફરિયાદ અનુસાર તેમના પરિવાર પાસે કુલ ત્રણ કાર છે અને એમાંથી ૨૦૧૧માં ટૉયોટા કંપનીની નવી કાર ખરીદી હતી. આ ઉપરાંત ૧૪ ફેબ્રુઆરીએ તેમણે વધુ એક નવી કાર ખરીદી હતી. દરમ્યાન તેમની બહેન ઉત્તરાખંડની ધ્યાન શિબિર માટે જતા હોવાથી તેને ત્યાં કારની જરૂર હતી એટલે તેમણે પોતાની કાર ઉત્તરાખંડ મોક્લવાનું નક્કી કર્યું હતું.
૧૯ ફેબ્રુઆરીએ ફરિયાદીના પિતાએ વીઆરએલ લોજિસ્ટિક કંપનીનો ઑનલાઇન કોન્ટેક્ટ કર્યો ત્યારે એ મૂવર્સ ઍન્ડ પૅકર્ક્સ સર્વિસ કંપની એપીએમસી માર્કેટ ખાતે હોવાનું જાણવા મળ્યું હતું. એ પછી કારને ઉત્તરાખંડ મોકલવાનું કહેતાં ૧૦,૫૦૦ રૂપિયાનું ક્વોટેશન મોકલ્યું હતું અને ક્યુઆર કોડ મોકલીને વૉટ્સઍપ પર પૈસા મોકલવાનું જણાવ્યું હતું. ફરિયાદીના પિતાએ તેની સાથે પૈસાનો વ્યવહાર કર્યો હતો અને એક વ્યક્તિ ૨૦ ફેબ્રુઆરીએ કાર લેવા મુલુંડ ટોલનાકા પર આવી હતી. એ પછી મૂવર્સ ઍન્ડ પૅકર્સ સર્વિસ કંપનીના માણસો કાર લઈને ચાલ્યા ગયા હતા.
૨૨ ફેબ્રુઆરીએ ફરિયાદીના મોબાઇલ પર મુલુંડ ટોલનાકા પરથી કાર પસાર થઈ હોવાનો મેસેજ આવ્યો હતો એટલે ફરિયાદીએ વીઆરએલ કંપનીને ફોન કરીને તેમની કાર વિશે પછપરછ કરતાં તેણે કહ્યું કે કાર કન્ટેનરમાંથી ઉદેપુર રાજસ્થાન પહોંચી છે, પણ જ્યારે ફરિયાદીએ તેને કહ્યું કે મુલુંડ ટોલ-બૂથ પર કારનો ટોલ ચૂકવવામાં આવ્યો હોવાનો મેસેજ અમને પ્રાપ્ત થયો છે ત્યારે તેણે ઈનકાર કર્યો હતો. ફરિયાદીએ તેને કાર ઉદયપુર મૂકવા કહ્યું હતું. એ પછી તેમણે ફરિયાદીને ઉદયપુર ખાતે કાર લઈ જવા માટે ૨૮,૦૦૦ રૂપિયા ભરવાનું કહ્યું. એ સમયે ફરિયાદીએ તેને વિડિયો—કૉલ કરીને કાર બતાવવાનું કહ્યું ત્યારે સામેની વ્યક્તિએ કહ્યું કે પહેલાં પૈસા ચૂકવો, પછી કાર બતાવાશે. અંતે વધુ તપાસ કરતાં આ મૂવર્સ ઍન્ડ પૅકર્સ સર્વિસ કંપની બનાવટી હોવાની જાણ થઈ હતી. અંતે પોતાની સાથે થયેલી છેતરપિંડી સમજાતાં આ ઘટનાની ફરિયાદ મુલુંડ પોલીસ સ્ટેશનમાં નોંધાવવામાં આવી હતી.
મુલુંડના એક સિનિયર પોલીસ અધિકારીએ કહ્યું હતું કે ‘પ્રાથમિક માહિતીના આધારે અમે છેતરપિંડીની ફરિયાદ નોંધીને વધુ તપાસ હાથ ધરી છે. આ કેસમાં ટોલનાકાના સીસીટીવી કેમેરાનાં ફુટેજ તપાસવામાં આવી રહ્યાં છે.’
ગુર્જરભૂમિની ફ્રી ઈ-કોપી દર રવિવારે રેગ્યુલર મેળવવા નીચે આપેલ લીંક પર ક્લિક કરો અને જોડાઓ ગુર્જરભૂમિના whatsapp કમ્યુનિટીમાં. Join Gurjarbhoomi’s What’s app Community for regular updates by clicking d link given below… https://chat.whatsapp.com/FUuyFAF4F2mJbjriRJ3hLH
