સ્માઈલી ક્લબનો આ વખતનો કાર્યક્રમ ખરેખર અદભુત અને અવિસ્મરણીય હતો. જેમાં બુધવાર તારીખ 15 મેના રોજ સૌપ્રથમ સવારે સાત કલાકે કાર્યક્રમની શરૂઆત ડો. આંબેડકર રોડ સ્થિત રાસબરી ફેશન્સ મુલુંડ વેસ્ટ ખાતે ભાજપા મહાયુતીના ઉમેદવાર મિહિર કોટેચાના ધર્મપત્ની શ્રીમતી પાયલ મિહિર કોટેચાને આગામી ચૂંટણી માટેની શુભેચ્છાઓ આપી તેમના સન્માન સાથે કરવામાં આવી હતી. સોમવાર તારીખ 20 મેના રોજ લોકસભાની ચૂંટણી હોવાથી આમદાર મિહિર કોટેચાનું શેડ્યુલ વ્યસ્ત હોવાથી તેઓ પોતે ઉપસ્થિત રહી શક્યા નહોતા. શુભેચ્છા અને સન્માનના કાર્યક્રમમાં રાસબરી ફેશન્સના રશ્મિબેન શાહનો સારોએવો સહયોગ મળ્યો હતો. ત્યાર બાદ સ્માઈલી ક્લબ AC બસમાં નાસ્તો અને ઠંડા પીણાની વ્યવસ્થા કરી અને આગળ ઓબેરોય મોલ ગોરેગાંવમાં શ્રીકાંત ફિલ્મ સાથે નિહાળી હતી જે એક અદ્ભુત ફિલ્મ હતી. દરેકે ઓબેરોય મોલમાં ખૂબ જ મજા કરી અને મહારાજા ભોગ રેસ્ટોરન્ટ ખાતે લંચ લીધું હતું.
સ્માઇલી ક્લબના પ્રેસિડેન્ટ ભારતી વાસાના અથાગ પ્રયત્નોને કારણે આ પ્રસંગ વધુ આનંદદાયક અને નોંધપાત્ર બની રહ્યો હતો. ભારતી વાસા સ્માઈલી ક્લબનો આધારસ્તંભ છે અને તેના કમિટી મેમ્બર્સ તથા સભ્યોનાં સાથ સહકારને લીધે તમામ ઈવેન્ટ્સ સફળ થાય છે. સ્માઈલી ક્લબના દરેક કાર્યક્રમમાં ભારતીબેન વાસાની સાથે તેમના કમિટી મેમ્બર્સ પણ ભારે જહેમત ઉઠાવીને કાર્યક્રમને સફળ અને યાદગાર બનાવે છે. દર વખતની જેમ આ વખતનો કાર્યક્રમ પણ તદ્દન અનોખો અને ધમાકેદાર રહ્યો હતો તેવું સ્માઈલી ક્લબના પ્રેસિડેન્ટ ભારતીબેન વાસા અને સોના સોમૈયાએ ગુર્જરભૂમિ સાથે વાત કરતા જણાવ્યું હતું.
