ઘાટકોપરમાં ઈસ્ટર્ન એક્સપ્રેસ હાઇવે પર લગાડવામાં આવેલું તોતિંગ હોર્ડિંગ ૧૩ મેએ ફૂંકાયેલા ડસ્ટ સ્ટૉર્મમાં તૂટીને બાજુના પેટ્રોલ પમ્પ પર પડ્યું હતું. એ દુર્ઘટનામાં ૧૬ જણનાં મોત થયાં હતાં અને ૭૦ લોકો ઘાયલ થયા હતા. એમાંથી KEM હૉસ્પિટલમાં સારવાર લઈ રહેલા બાવન વર્ષના રાજુ સોનાવણેનું રવિવારે રાતે ૧૧ વાગ્યે સારવાર દરમ્યાન મૃત્યુ થયું હતુ. એથી એ દુર્ઘટનામાં મૃત્યુ પામેલા લોકોની સંખ્યા હવે ૧૭ પર પહોંચી છે એમ બૃહમુંબઈ મ્યુનિસિપલ કૉર્પોરેશન (BMC)એ ગઈ કાલે જણાવ્યું હતું.
![](https://gurjarbhoomi.com/wp-content/uploads/2024/05/03.jpg)
જોરદાર પવનને લીધે વંટોળિયા સાથે આવેલા વરસાદને કારણે તોતિંગ હોર્ડિંગ તૂટીને બાજુના પેટ્રોલ પમ્પ પર પડયું હતું. એ વખતે ત્યાં અનેક વાહનો પેટ્રોલ, ડીઝલ અને કૉમ્પ્રેસ્ડ નૅચરલ ગૅસ (CNG) ભરાવવા લાઈનમાં ઊભાં હતાં. આ ઉપરાંત વરસાદને કારણે ઘણા લોકો વરસાદથી બચવા પેટ્રોલ પમ્પ નીચે આવીને ઊભા રહ્યા હતા. ૬૬ કલાક સુધી એનું બચાવકાર્ય ચાલ્યું હતું. એ ઘટનામાં ઘવાયેલા હજી કેટલાક લોકો હૉસ્પિટલમાં સારવાર લઈ રહ્યા છે.
![](https://gurjarbhoomi.com/wp-content/uploads/2024/04/06-42.jpg)