ઘાટકોપર છેડાનગરમાં અનધિકૃત હોર્ડિંગ તૂટી પડીને 17 નિર્દોષનો ભોગ લેવાયો અને અનેક ઘાયલ થયા તે દુર્ઘટનામાં હોર્ડિંગ માટે સ્ટ્રક્ચરલ સ્ટેબિલિટીનો હકારાત્મક રિપોર્ટ આપનારા એન્જિનિયરની પોલીસે ધરપકડ કરી છે. બીજી બાજુ આ દુર્ઘટનામાં ઈગો મિડિયાના માલિક ભાવેશ પ્રભુદાસ ભિંડેની પોલીસ કસ્ટડી પૂરી થતાં ફરીથી ગુરુવારે કોર્ટમાં હાજર કરાયો હતો. કોર્ટે તેને જ્યુડિશિયલ કસ્ટડી આપી હતી. આથી તેને માટે જામીનનો માર્ગ મોકળો બની ગયો છે એમ કહેવાય છે.
દરમિયાન ભાજપના વરિષ્ઠ નેતા કિરીટ સોમૈયાએ સ્ટ્રક્ચરલ સ્ટેબિલિટીનો રિપોર્ટ આપનારા મનોજ રામકૃષ્ણ સ્ટ્રક્ચરલ કન્સલ્ટન્ટ વિરુદ્ધ પણ કાર્યવાહીની માગણી કરી હતી, જે પછી મનોજની ધરપકડ કરવામાં આવી છે. તેના દ્વારા 24 એપ્રિલ, 2023ના રોજ 120 ફૂટ બાય 70 ફૂટના હોર્ડિંગને સ્ટ્રક્ચરલ સ્ટેબિલિટી સર્ટિફિકેટ આપ્યું હતું. ઉપરાંત 80 બાય 80 ફૂટના હોર્ડિંગ્સને પણ સર્ટિફિકેટ આપ્યું હતું. તેણે ભાવેશ સાથે સાઠગાંઠ કરીને બોગસ, ખોટું સર્ટિફિકેટ આપ્યું. અમને માહિતી અધિકાર અંતર્ગત જીઆરપીની ફાઈલમાંથી આ સર્ટિફિકેટ મળ્યું છે, એમ સોમૈયાએ જણાવ્યું હતું.
આ પ્રકરણમાં પોલીસ દ્વારા હાલના રેલવે એસીપી શહાજી નિકમની સળંગ બે દિવસ પૂછપરછ કરી હતી. સર્વત્ર હાહાકાર મચાવનારી અનધિકૃત હોર્ડિંગ્સ બીપીસીએલના પેટ્રોલપંપ પર તૂટી પડડ્યું તે પ્રકરણે પોલીસ દ્વારા રેલવેએસીપીની બે દિવસથી પૂછપરછ ચાલુ છે. તેમાં રેલવે પોલીસના ખાતામાં હોર્ડિંગ થકી લાખ્ખો રૂપિયા જમા થઈ રહ્યા હતા એવી માહિતી બહાર આવી છે.
પ્રથમ ત્રણ હોર્ડિંગની તુલનામાં ચોથું હોર્ડિંગ (એટલે કે દુર્ઘટનાગ્રસ્ત) થકી રેલવેના ખાતામાં સૌથી વધુ રકમ જમા થઈ હતી. ત્રણ હોર્ડિંગના રૂ. 13 લાખ મળતા હતા, જ્યારે ચોથા થકી રૂ. 11 લાખ મળતા હતા, એમ તપાસમાં બહાર આવ્યું છે. પ્રથમ ત્રણ હોર્ડિંગને આધારે જ ચોથા હોર્ડિંગ માટે તત્કાલીન રેલવે પોલીસ કમિશનર (જીઆરપી) કૈસર ખાલીદના કહેવા પરથી પરવાનગી આપી હોવાનું ક્રાઈમ બ્રાન્ચની પૂછપરછમાં નિકમે જણાવ્યું છે. હોર્ડિંગ માટે 10 વર્ષના કોન્ટ્રાક્ટ પણ ખાલીદના કહેવા પરથી 7 જુલાઈ, 2022ના રોજ વધારવામાં આવ્યા હોવાનું નિકમે પૂછપરછમાં જણાવ્યું છે.
ગુર્જરભૂમિની ફ્રી ઈ-કોપી દર રવિવારે રેગ્યુલર મેળવવા નીચે આપેલ લીંક પર ક્લિક કરો અને જોડાઓ ગુર્જરભૂમિના whatsapp કમ્યુનિટીમાં. Join Gurjarbhoomi’s What’s app Community for regular updates by clicking d link given below… https://chat.whatsapp.com/Jz0XOUEnFnbGHIncMaqbrw
