મુલુન્ડ વિસ્તારમાંથી એક ચિંતાજનક ઘટના સામે આવી છે, જ્યાં લાલબાગના ગણપતિના દર્શન કરવાનું કહીને નીકળેલી ૧૭ વર્ષીય સગીરા રહસ્યમય સંજોગોમાં ગુમ થઈ ગઈ છે. પરિવારજનોની ફરિયાદના આધારે મુલુન્ડ પોલીસે અજાણ્યા શખ્સ સામે અપહરણનો કેસ નોંધી તપાસ હાથ ધરી છે.
‘કાકીના ઘરે જાઉં છું’ કહી નીકળેલી દીકરી પરત ન ફરી
મુલુન્ડ (વેસ્ટ) સ્થિત ઈન્દિરાનગરમાં રહેતી અને ધોરણ ૧૨માં અભ્યાસ કરતી ૧૭ વર્ષીય વિદ્યાર્થીની ગત ૨૨ સપ્ટેમ્બરના રોજ પોતાની માતાને કાકીના ઘરે જવાનું કહીને નીકળી હતી. જોકે, કલાકો વીતી ગયા પછી પણ દીકરી ઘરે ન આવતાં માતાએ કાકીના ઘરે તપાસ કરી હતી. ત્યાંથી જાણવા મળ્યું હતું કે સગીરા ત્યાં પહોંચી જ નહોતી.
આ સાંભળી પરિવારજનો ચોંકી ઉઠ્યા હતા અને તેમણે તાત્કાલિક સંબંધીઓ, સગીરાની સહેલીઓ તથા આસપાસના વિસ્તારોમાં તેની શોધખોળ શરૂ કરી હતી, પરંતુ તેનો કોઈ પત્તો લાગ્યો નહોતો.
અડધી રાત્રે આવ્યો ફોન: “હું લાલબાગના દર્શને આવી છું”
શોધખોળ દરમિયાન સગીરાનો ફોન સતત બંધ આવતો હતો. જોકે, મોડી રાત્રે આશરે ૨ વાગ્યાના સુમારે અચાનક સગીરા સાથે ફોન પર સંપર્ક થયો હતો. તેણે પરિવારને જણાવ્યું કે તે લાલબાગના ગણપતિના દર્શન કરવા આવી છે અને સવારે ઘરે પાછી આવી જશે. આટલું બોલ્યા બાદ તુરંત જ તેનો ફોન ફરીથી સ્વીચ્ડ ઓફ થઈ ગયો હતો.
સવારે પરત ન આવતાં પિતાએ નોંધાવી પોલીસ ફરિયાદ
બીજી સવારે પણ સગીરા ઘરે પરત ન ફરતાં પરિવારની ચિંતામાં વધારો થયો હતો. પુત્રીનો કોઈ સંપર્ક ન થઈ શકતાં આખરે તેના પિતાએ મુલુન્ડ પોલીસ સ્ટેશને પહોંચીને આ અંગે જાણ કરી હતી. સગીરા વયસ્ક ન હોવાથી પોલીસે અજાણ્યા વ્યક્તિ દ્વારા તેનું લાલચ આપીને અપહરણ કરવામાં આવ્યું હોવાની આશંકા વ્યક્ત કરી ફરિયાદ નોંધી છે. હાલ પોલીસ મોબાઈલ ટાવર લોકેશન અને સીસીટીવી ફુટેજની મદદથી ગાયબ થયેલી સગીરાનો તાગ મેળવવાનો પ્રયાસ કરી રહી છે.
Join Gurjarbhoomi Whats App Community by clicking the link follows… https://chat.whatsapp.com/Lq3zyzww3SV9hJK04b1VVA
For more details… Contact 9322529232 / 9324483455
Follow us on Instagram & Facebook by clicking the logo below…
About the Author
