મુંબઈથી શિર્ડી જઈ રહેલી એક ૪૫ વર્ષીય મહિલા મુસાફરને બસમાં જ પોતાને ‘ડોક્ટર’ ઓળખાવનાર અજાણ્યા શખ્સે શિકાર બનાવી લૂંટ ચલાવી હોવાનો સનસનાટીભર્યો કિસ્સો સામે આવ્યો છે. ઠગ ભગતે મહિલાને એસિડિટી અને ડાર્ક સર્કલની સારવારના નામે બેભાન કરનારી ગોળીઓ ખવડાવી દીધી હતી અને તેણીની નજર ચૂકવી સોનાના ઘરેણાં લૂંટીને નાસી છૂટ્યો હતો. આ મામલે મુંબઈ પોલીસે અજાણ્યા આરોપી સામે ગુનો નોંધી વધુ તપાસ હાથ ધરી છે.
૧ ઓક્ટોબરે કુરલાથી શિર્ડી બસમાં બની ઘટના
પોલીસ એફ.આઈ.આર. (FIR) મુજબ, ચેમ્બુરના સિંધી સોસાયટી ખાતે રહેતા ૪૫ વર્ષીય શોભા મહેશ ફાટા નામના મહિલા ૧ ઓક્ટોબરે પોતાની મેડિકલ તપાસ અર્થે કોપરગાંવ જવા નીકળ્યા હતા. બપોરે આશરે ૧૨:૪૫ વાગ્યાના સુમારે તેમણે કુરલાના નેહરુ નગર બસ સ્ટેન્ડથી નેહરુ નગર-શિર્ડી એસ.ટી. બસ પકડી હતી. બસમાં ભારે ભીડ હોવાથી શોભાબેન પાછળની સીટ પર બેઠા હતા.
ડાર્ક સર્કલ અને એસિડિટીની સારવારના નામે હાથચાલાકી
પ્રવાસ દરમિયાન આશરે ૩૫ વર્ષની વયનો એક અજાણ્યો શખ્સ તેમની પાસે આવ્યો હતો અને બાજુની સીટ ખાલી હોવાથી ત્યાં બેસી ગયો હતો. હિન્દીમાં વાતચીત શરૂ કરીને આ શખ્સે પોતાની ઓળખ નાસિક જઈ રહેલા એક ડોક્ટર તરીકે આપી હતી. વાતો વાતોમાં તેણે મહિલાને કહ્યું કે “તમારી આંખો નીચે કાળા કુંડાળા (ડાર્ક સર્કલ) છે અને તમને એસિડિટીની તકલીફ લાગે છે.” ત્યારબાદ તેણે મહિલાની નાડી (Pulse) તપાસી હતી અને સારવાર માટે પોતાની પાસે રહેલી કેટલીક દવાઓ/ગોળીઓ આપી હતી.
હોસ્પિટલમાં આંખ ખૂલી ત્યારે મંગળસૂત્ર-એરિંગ્સ ગાયબ
ડોક્ટર સમજીને મહિલાએ તે ગોળીઓ ગળી લીધી હતી. ગોળીઓ ખાધાના થોડા જ સમયમાં તેઓ ગાઢ બેભાન અવસ્થામાં સરી પડ્યા હતા. બાદમાં જ્યારે તેમને હોશ આવ્યા ત્યારે તેઓ કોપરગાંવની એક હોસ્પિટલમાં હતા. ભાનમાં આવતા જ તેમને ખબર પડી કે તેમના ગળામાંથી ૧૮ ગ્રામનું સોનાનું મંગળસૂત્ર અને કાનની સોનાની એરિંગ્સ (ઝુમખાં) ગાયબ હતા.
પોલીસે તપાસનો ધમધમાટ શરૂ કર્યો
મહિલાના નિવેદનના આધારે મુંબઈની નેહરુ નગર પોલીસે અજાણ્યા બોગસ ડોક્ટર વિરુદ્ધ લૂંટ અને ઝેર/નશાકારક પદાર્થ આપવાનો ગુનો નોંધી તપાસ ચાલુ કરી છે. પોલીસ હાલમાં કુરલા બસ સ્ટેન્ડ અને બસ રૂટ પરના વિવિધ સીસીટીવી (CCTV) ફૂટેજ સ્કેન કરી રહી છે જેથી આ ઠગ ડોક્ટરની ઓળખ કરી તેને ઝડપી શકાય.
સાવચેતીનો સંદેશ: બસ, ટ્રેન કે જાહેર પરિવહનમાં પ્રવાસ કરતી વખતે કોઈ પણ અજાણ્યા વ્યક્તિ પર અંધશ્રદ્ધા ન રાખવી અને તેમના દ્વારા આપવામાં આવતી ખાવા-પીવાની વસ્તુઓ કે દવાઓનો બિલકુલ સ્વીકાર ન કરવો.
Join Gurjarbhoomi Whats App Community by clicking the link follows… https://chat.whatsapp.com/InDRknMaSTQCOE24MRAoPg
For more details… Contact 9322529232 / 9324483455
Follow us on Instagram & Facebook by clicking the logo below…
About the Author
