ઘાટકોપર (વેસ્ટ) વિસ્તારમાં એક હૃદયકંપાવનારી અને સનસનાટીભરી ઘટના સામે આવી છે. એસ. જી. બર્વેનગર કોલોનીના ગાર્ડનમાં રમવા ગયેલા ૧૪ વર્ષના સગીર વિદ્યાર્થીને અટકાવી, ચપ્પુ બતાવી ડરાવ્યા બાદ ગળાના ભાગે સિરિન્જ વડે શંકાસ્પદ ઇન્જેક્શન મારી દેવામાં આવ્યું હતું. હુમલા બાદ વિદ્યાર્થી સ્થળ પર જ બેભાન થઈ ગયો હતો. હાલમાં તેને તાત્કાલિક મુક્તાબાઈ હોસ્પિટલમાં સારવાર અર્થે ખસેડવામાં આવ્યો છે, જ્યાં તેની તબિયત ખતરાની બહાર હોવાનું જાણવા મળ્યું છે. આ મામલે ઘાટકોપર પોલીસે પાંચ અજાણ્યા શખસો સામે ગુનો નોંધી તેમની શોધોખોળ હાથ ધરી છે.
રમત-રમતમાં ઝઘડો અને જીવલેણ હુમલો
પીડિત વિદ્યાર્થીના પિતા રામુ ચૌરસિયાના જણાવ્યા અનુસાર, તેમનો ૧૪ વર્ષનો પુત્ર યશ ચૌરસિયા ઘાટકોપરની BMC સ્કૂલ નંબર-૩માં સાતમા ધોરણમાં અભ્યાસ કરે છે. સોમવારે સાંજે આશરે ૭ વાગ્યાના સુમારે યશ તેના પિતરાઈ ભાઈ સાથે બર્વેનગરના ગાર્ડનમાં રમવા ગયો હતો.
દરમિયાન, અચાનક આવેલી પાંચ અજાણ્યા લોકોની ટોળકીએ “અહીં કેમ રમો છો?” કહીને બાળકો સાથે અણછાજતી વર્તણૂક અને મારપીટ શરૂ કરી દીધી હતી. ડરી ગયેલો પિતરાઈ ભાઈ કોઈક રીતે ત્યાંથી ભાગવામાં સફળ રહ્યો હતો, પરંતુ હુમલાખોરોએ યશને પકડી રાખ્યો હતો. ત્યારબાદ તેને ચપ્પુ બતાવીને ડરાવ્યો હતો અને ગળાના ભાગે કેમિકલ કે દવાનું ઇન્જેક્શન મારી દીધું હતું.
બાળકના પિતા અને પરિવારજનોની ત્વરિત કાર્યવાહી
ઘટનાની જાણ થતાં જ પરિવારજનો તુરંત ઘટનાસ્થળે પહોંચ્યા હતા અને સ્થળ પર જ બેભાન હાલતમાં પડેલા યશને સારવાર માટે મુક્તાબાઈ હોસ્પિટલમાં દાખલ કર્યો હતો. મંગળવારે સવારે યશને ભાન આવ્યા બાદ પરિવારજનોએ ઘાટકોપર પોલીસ સ્ટેશન પહોંચીને સત્તાવાર રીતે ફરિયાદ નોંધાવી હતી.
પોલીસ તપાસ અને કાર્યવાહી: ૪ અલગ-અલગ ટીમો તૈનાત
| તપાસના મુખ્ય મુદ્દા | પોલીસ કાર્યવાહીની વિગતો |
| પોલીસ ટીમો | આરોપીઓને ત્વરિત પકડવા માટે ઘાટકોપર પોલીસે ૪ વિશેષ ટીમો બનાવી છે. |
| CCTV & સ્થાનીક તપાસ | ઘટનાસ્થળ અને આસપાસના વિસ્તારના CCTV ફુટેજ સ્કેન કરવામાં આવી રહ્યા છે. |
| મેડિકલ રિપોર્ટ | બાળકને કયા પ્રકારનું કેમિકલ કે દવા આપવામાં આવી હતી તે જાણવા માટે બ્લડ-સેમ્પલ લેબમાં મોકલાયા છે. |
ઘાટકોપર પોલીસ સ્ટેશનના એક સિનિયર અધિકારીએ જણાવ્યું હતું કે, “આ એક અત્યંત ગંભીર મામલો છે. પાંચેય આરોપીઓ સામે ગુનો નોંધીને ડૉક્ટરો સાથે સંકલન સાધી આગળની કાનૂની અને વૈજ્ઞાનિક તપાસ ચાલુ રાખવામાં આવી છે. વહેલી તકે તમામ આરોપીઓની અટકાયત કરવામાં આવશે.”
Join Gurjarbhoomi Whats App Community by clicking the link follows… https://chat.whatsapp.com/InDRknMaSTQCOE24MRAoPg
For more details… Contact 9322529232 / 9324483455
Follow us on Instagram & Facebook by clicking the logo below…
About the Author
