ઘાટકોપર વિસ્તારમાં વહેલી સવારે એક માર્ગ અકસ્માતની ઘટના સામે આવી છે. ઘાટકોપરના કામરાજનગર નજીક પૂરઝડપે આવી રહેલી એક ટ્રક અચાનક નિયંત્રણ ગુમાવતાં રોડના ડિવાઈડર સાથે અથડાઈને પલટી મારી ગઈ હતી. વહેલી સવારે બનેલી આ ઘટનાને કારણે વિસ્તારમાં ક્ષણભર માટે દોડધામ મચી ગઈ હતી.
સવારે ૬.૩૦ વાગ્યે સર્જાયો અકસ્માત
મળતી વિગતો મુજબ, આ અકસ્માત વહેલી સવારે આશરે ૬.૩૦ વાગ્યાના સુમારે બન્યો હતો. ટ્રકચાલકે નિયંત્રણ ગુમાવતા ટ્રક ધડાકાભેર રોડ ડિવાઈડર સાથે અથડાઈ હતી અને માર્ગ પર જ પલટી ખાઈ ગઈ હતી. અકસ્માત એટલો જોરદાર હતો કે ટ્રકના આગળના ભાગને ભારે નુકસાન પહોંચ્યું છે.
સદનસીબે મોટી જાનહાનિ ટળી
વહેલી સવારનો સમય હોવાથી રસ્તા પર વાહનોની અવરજવર અને પદયાત્રીઓની સંખ્યા ઓછી હતી. અકસ્માતની ગંભીરતા જોતાં સદનસીબે આ ઘટનામાં કોઈ વ્યક્તિને ગંભીર ઈજા કે જાનહાનિ થઈ નથી, જેથી સ્થાનિકો અને પોલીસે રાહતનો શ્વાસ લીધો હતો.
કલાકો સુધી ટ્રાફિક જામ: પોલીસે ટ્રક હટાવી રસ્તો ક્લિયર કર્યો
ઘટનાની જાણ થતાં જ સ્થાનિક પોલીસ અને ટ્રાફિક પોલીસનો કાફલો ઘટનાસ્થળે દોડી આવ્યો હતો. માર્ગની વચ્ચે જ ટ્રક પલટી મારી ગઈ હોવાથી સવારના સમયે કામકાજે નીકળેલા વાહનચાલકોને ભારે હાલાકીનો સામનો કરવો પડ્યો હતો અને રસ્તા પર થોડા કલાકો માટે ટ્રાફિક જામની સ્થિતિ સર્જાઈ હતી.
પોલીસે ક્રેનની મદદથી પલટી ગયેલી ટ્રકને રસ્તા પરથી દૂર કરવાની કામગીરી હાથ ધરી હતી. કલાકોની જહમત બાદ રોડ પરનો ટ્રાફિક પૂર્વવત કરવામાં આવ્યો હતો. પોલીસે આ મામલે અકસ્માતનો ગુનો નોંધી વધુ તપાસ હાથ ધરી છે.
Join Gurjarbhoomi Whats App Community by clicking the link follows… https://chat.whatsapp.com/InDRknMaSTQCOE24MRAoPg
For more details… Contact 9322529232 / 9324483455
Follow us on Instagram & Facebook by clicking the logo below…
About the Author
