પોલીસ સ્ટેશન કે બીટ ચોકીમાંથી સામાન ચોરી થવો એ દુર્લભ ઘટના છે, પરંતુ મુંબઈમાં એક અજીબોગરીબ કિસ્સો સામે આવ્યો છે. વીપી રોડ (VP Road) પોલીસ સ્ટેશનની બીટ ચોકીમાંથી પોલીસનો સત્તાવાર ‘વોકી-ટોકી’ (Walkie-Talkie) સેટ ચોરી કરનાર એક ૨૪ વર્ષીય યુવકની મુંબઈ પોલીસે અંધેરી રેલવે સ્ટેશન પરથી ધરપકડ કરી છે. ચોરી પાછળનું કારણ પૂછતાં આરોપીએ જણાવ્યું હતું કે, વોકી-ટોકીના વારંવાર વાગતા અવાજથી કંટાળીને તેણે આ પગલું ભર્યું હતું!
ચાર્જિંગમાં મૂકેલો વોકી-ટોકી ગાયબ થયો હતો પોલીસના જણાવ્યા અનુસાર, આ ઘટના ૧૭ સપ્ટેમ્બરના રોજ બની હતી. વીપી રોડ પોલીસ સ્ટેશન હેઠળ આવતી ‘ટૂ ટાંક’ (Two Tank) બીટ ચોકીમાં એક વોકી-ટોકી સેટ ચાર્જિંગ માટે મૂકવામાં આવ્યો હતો. કોઈ અજાણ્યો શખ્સ ચોકીમાંથી આ સેટ ચોરીને ગાયબ થઈ ગયો હતો. પોલીસ કંટ્રોલ રૂમ સાથે સંપર્ક સાધવા માટે અત્યંત મહત્વપૂર્ણ ગણાતા આ ઉપકરણની ચોરી થતાં જ પોલીસ એક્શન મોડમાં આવી ગઈ હતી અને અજાણ્યા શખ્સ સામે ગુનો નોંધી તપાસ શરૂ કરી હતી.
૭૦૦ સીસીટીવી કેમેરાની મદદથી આરોપીનો પીછો કરાયો આરોપી સુધી પહોંચવા માટે પોલીસે સમગ્ર વિસ્તારના આશરે ૭૦૦ જેટલા સીસીટીવી (CCTV) કેમેરાના ફૂટેજ ચકાસ્યા હતા. સીસીટીવી ફૂટેજની મદદથી પોલીસે આરોપીના રૂટનો પીછો કર્યો હતો. આખરે ટેકનિકલ સર્વેલન્સ અને સીસીટીવીના આધારે પોલીસે આરોપીનું લોકેશન ટ્રેસ કરીને તેને અંધેરી રેલવે સ્ટેશન પરથી દબોચી લીધો હતો.
ઉત્તર પ્રદેશનો વતની છે આરોપી ઝડપાયેલા આરોપીની ઓળખ મોહમ્મદ નિયાઝ ઉર્ફે ફૈઝાન તરીકે થઈ છે, જે મૂળ ઉત્તર પ્રદેશના અલ્હાબાદ (પ્રયાગરાજ)નો વતની છે. મુંબઈમાં તેનો કોઈ કાયમી આશરો કે ઘર નથી અને તે સામાન્ય રીતે રેલવે સ્ટેશનો અને ફૂટપાથ પર રખડતું-ભટકતું જીવન જીવે છે.
ચોરીનું કારણ સાંભળી પોલીસ પણ ચોંકી ગઈ પોલીસ પૂછપરછ દરમિયાન જ્યારે મોહમ્મદ નિયાઝને વોકી-ટોકી ચોરવાનું કારણ પૂછવામાં આવ્યું, ત્યારે તેણે જણાવ્યું કે વોકી-ટોકી પર સતત મેસેજ અને રિંગ વાગી રહી હતી. તેના સતત આવતા અવાજથી તે ખૂબ જ કંટાળી (ઈરિટેટ થઈ) ગયો હતો, જેથી તેણે ગુસ્સામાં આવીને તે ઉપકરણ ત્યાંથી ઉઠાવી લીધું હતું.
પોલીસે આરોપી પાસેથી ચોરાયેલો વોકી-ટોકી સેટ સફળતાપૂર્વક રિકવર કરી લીધો છે અને તેની સામે કાયદેસરની કાર્યવાહી હાથ ધરી છે.
Join Gurjarbhoomi Whats App Community by clicking the link follows… https://chat.whatsapp.com/Lq3zyzww3SV9hJK04b1VVA
For more details… Contact 9322529232 / 9324483455
About the Author
