૨ ડિસેમ્બર સુધી પ્રતિબંધાત્મક આદેશ અમલી: લાયસન્સ વિના ફટાકડાના વેચાણ, સંગ્રહ અને હેરફેર પર કડક રોક
મુંબઈ: દિવાળીના તહેવારો દરમિયાન જાહેર સ્થળોએ થતા ગેરકાયદેસર ફટાકડાના વેચાણ, સંગ્રહ અને જોખમી રીતે થતી હેરફેર પર અંકુશ લગાવવા માટે મુંબઈ પોલીસે ખાસ ઝુંબેશ હાથ ધરી છે. આ કાર્યવાહી અંતર્ગત પોલીસે ૪ થી ૯ નવેમ્બર દરમિયાન શહેરના વિવિધ વિસ્તારોમાં તપાસ કરીને કુલ ૨૭ એફઆઈઆર (FIR) નોંધી છે.
કયા વિસ્તારોમાં થઈ કાર્યવાહી?
પોલીસ અધિકારીઓના જણાવ્યા અનુસાર, જાહેર જનતાની સુરક્ષાને ધ્યાનમાં રાખીને આ સ્પેશિયલ ડ્રાઈવ ચલાવવામાં આવી હતી. આ દરમિયાન વરલી કોલીવાડા, મલાડ ઈસ્ટ અને જોગેશ્વરી સહિતના વિસ્તારોમાં માન્ય લાયસન્સ વિના ફટાકડા વેચતા, જાહેર રસ્તાઓ પર સ્ટોલ લગાવી પ્રદર્શન કરતા અને ગેરકાયદે રીતે ફટાકડાનો જથ્થો સંગ્રહ કરતા વિક્રેતાઓ સામે કડક કાયદેસરના પગલાં લેવામાં આવ્યા છે.
૨ ડિસેમ્બર સુધી રહેશે કડક નિયંત્રણો
ડીસીપી (ઓપરેશન્સ) અકબર પઠાણે આ અંગે માહિતી આપતા જણાવ્યું હતું કે, મુંબઈ પોલીસ કમિશનર દ્વારા બહાર પાડવામાં આવેલ પ્રતિબંધાત્મક આદેશ ૩ નવેમ્બરથી અમલમાં આવ્યો છે અને તે આગામી ૨ ડિસેમ્બર સુધી લાગુ રહેશે.
નિયમોનું ઉલ્લંઘન કરનાર સામે થશે કાર્યવાહી
આ જાહેરનામા મુજબ, સક્ષમ અધિકારીની પૂર્વ મંજૂરી કે માન્ય લાયસન્સ વિના ફટાકડાનું વેચાણ કરવા, તેનો સંગ્રહ કરવા, જાહેરમાં પ્રદર્શન કરવા કે પરિવહન કરવા પર સંપૂર્ણ પ્રતિબંધ મૂકવામાં આવ્યો છે. ફટાકડાના અનધિકૃત અને બેદરકારીભર્યા ઉપયોગથી સર્જાતી આગ કે અકસ્માતની સંભવિત દુર્ઘટનાઓને ટાળવા તેમજ નાગરિકોને પડતી અગવડતા નિવારવાના ઉદ્દેશ્યથી પોલીસ પ્રશાસન દ્વારા આ કડક નિર્ણય લેવામાં આવ્યો છે. આગામી દિવસોમાં પણ નિયમોનો ભંગ કરનારાઓ સામે આ જ રીતે કાર્યવાહી ચાલુ રહેશે તેવી ચેતવણી પોલીસે આપી છે.
Join Gurjarbhoomi Whats App Community by clicking the link follows… https://chat.whatsapp.com/InDRknMaSTQCOE24MRAoPg
For more details… Contact 9322529232 / 9324483455
Follow us on Instagram & Facebook by clicking the logo below…
About the Author
