મહારાષ્ટ્રના ભૂતપૂર્વ ગૃહમંત્રી અને શરદ પવાર જૂથના નેતા અનિલ દેશમુખે બુધવારે જણાવ્યું હતું કે, રાજ્યમાં મહાવિકાસ આઘાડી સરકાર હતી ત્યારે ભાજપના નેતા દેવેન્દ્ર ફડણવીસે મને એન્ફોર્સમેન્ટ ડિરેક્ટોરેટ (ઈડી)ની ભીંસમાંથી બચવું હોય તો તત્કાલીન મુખ્ય મંત્રી ઉદ્ધવ ઠાકરે, ઉપ મુખ્ય મંત્રી અજિત પવાર, મંત્રીઓ આદિત્ય ઠાકરે, અનિલ પરબ પર ગંભીર આક્ષેપો કરવા માટે દબાણ કર્યું હતું. આ આરોપને લઈ રાજકીય વિવાદ ઊભો થયો છે.
દેશમુખે કહ્યું કે, મેં ખોટા આક્ષેપો કરવાનો, એફિડેવિટ આપવાનો ઇનકાર કર્યો હતો. આથી મારી સામે ઈડી, સીબીઆઈ દ્વારા કાર્યવાહી કરવામાં આવી હતી. મને જેલમાં ધકેલી દેવામાં આવ્યો હતો. અખિલ ભારતીય અંધશ્રદ્ધા નિર્મૂલન સમિતિના અધ્યક્ષ શ્યામ માનવે પણ કહ્યું છે કે, દેશમુખ દ્વારા કરવામાં આવેલા આરોપોમાં સત્ય છે.
દેશમુખે જણાવ્યું હતું કે, અજિત પવાર અને પાર્થ પવારની હાજરીમાં મને દેવગિરિ બંગલામાં બોલાવાયો હતો અને ગુટખાના ધંધાવાળા પાસેથી દર મહિને કરોડો રૂપિયા કમાઈને આપવાની માગણી કરી હતી. મારી પર ઉદ્ધવ ઠાકરે, આદિત્ય ઠાકરે અને અનિલ પરબને ફસાવવાનું દબાણ હતું. મને સીધી ઓફર કરવામાં આવી હતી કે, જો હું ઉદ્ધવ ઠાકરે, આદિત્ય ઠાકરે, અનિલ પરબ, અજિત પવાર અને પાર્થ પવાર પર આરોપો કરીશ તો મને ઈડી કેસમાંથી છોડી દેવાશે.
દેશમુખે જણાવ્યું કે આદિત્ય ઠાકરેએ દિશા સાલિયન સાથે દુષ્કર્મ કર્યું અને તેને ઈમારતમાંથી ધક્કો મારી દીધો હતો એવો આરોપ કરવા કહેવાયું હતું. ગુટખા કેસમાં અજિત પવાર પર ખોટા આરોપ કરવા અને અનિલ પરબ પર પણ ખોટા આરોપ કરવા માટે કહેવામાં આવ્યું હતું.
હું દબાણને વશ થયો નથી. મેં ખોટા આક્ષેપો કરવા, સોગંદનામું આપવાનો સ્પષ્ટ ઇનકાર કર્યો હતો. તેથી જ ઈડી, સીબીઆઈના કેસ મારી પર લાગુ કરાયા. દેશમુખે ફડણવીસ પર ગંભીર આરોપ લગાવ્યો હતો કે, મારી પાસે ફડણવીસના માણસ દ્વારા આપવામાં આવેલું પરબીડિયું પુરાવા રૂપે છે. મેં આ કામ નહીં કરતાં મારી ધરપકડ કરાવવામાં આવી હતી. હું પુરાવા વિના બોલતો નથી. હું યોગ્ય સમયે પુરાવાઓ સામે લાવીશ. ફડણવીસ દ્વારા મોકલવામાં આવેલી વ્યક્તિનું નામ પણ જાહેર કરીશ, એમ પણ દેશમુખે જણાવ્યું હતું.
ગુર્જરભૂમિની ફ્રી ઈ-કોપી દર રવિવારે રેગ્યુલર મેળવવા નીચે આપેલ લીંક પર ક્લિક કરો અને જોડાઓ ગુર્જરભૂમિના whatsapp કમ્યુનિટીમાં. Join Gurjarbhoomi’s What’s app Community for regular updates by clicking d link given below… https://chat.whatsapp.com/Jz0XOUEnFnbGHIncMaqbrw