ભારતના પ્રખ્યાત ‘આદિત્ય બિરલા ગ્રુપ’ ના નેતૃત્વવાળા કન્સોર્ટિયમે 1.8 બિલિયન ડોલરમાં ખરીદ્યા RCB ના માલિકી હક. રાજસ્થાન રોયલ્સ (15300 કરોડ) ને પણ પાછળ રાખી RCB બની IPL ના ઈતિહાસની અત્યાર સુધીની સૌથી મોંઘી ફ્રેન્ચાઇઝી.
IPL 2026 ની શરૂઆત પહેલા જ ક્રિકેટ જગતમાંથી એક ખૂબ જ મોટા અને ચોંકાવનારા સમાચાર સામે આવ્યા છે. તાજેતરમાં જ રાજસ્થાન રોયલ્સે સૌથી મોંઘી ટીમ બનવાનો રેકોર્ડ બનાવ્યો હતો, પરંતુ હવે ગત વર્ષની (2025 ની) ચેમ્પિયન ટીમ રોયલ ચેલેન્જર્સ બેંગલુરુ (RCB) એ આ રેકોર્ડ તોડી નાખ્યો છે. અબજોપતિ ઉદ્યોગપતિ કુમાર મંગલમ બિરલાના નેતૃત્વવાળા ‘આદિત્ય બિરલા ગ્રુપ’ અને અન્ય રોકાણકારોના કન્સોર્ટિયમે 1.8 બિલિયન ડોલર એટલે કે આશરે 16896 કરોડ રૂપિયાની રેકોર્ડ-બ્રેકિંગ ડીલમાં RCB ને ખરીદી લીધી છે. આ સાથે જ RCB હવે IPL ના 18 વર્ષના સમૃદ્ધ ઈતિહાસમાં વેચાયેલી અત્યાર સુધીની સૌથી મોંઘી ફ્રેન્ચાઇઝી બની ગઈ છે.
કોણ કોણ છે આ નવા માલિકી ગ્રુપમાં?
આ ઐતિહાસિક ડીલમાં માત્ર આદિત્ય બિરલા ગ્રુપ જ એકલું નથી. કેટલાક અહેવાલો મુજબ, આ કન્સોર્ટિયમ (ગ્રુપ) માં અમેરિકાના જાણીતા સ્પોર્ટ્સ રોકાણકાર ડેવિડ બ્લિટ્ઝર, યુએસ પ્રાઈવેટ ઈક્વિટી ફર્મ ‘બ્લેકસ્ટોન’ અને ભારતની પ્રખ્યાત મીડિયા કંપની ‘ટાઈમ્સ ઓફ ઈન્ડિયા’ નો પણ સમાવેશ થાય છે. આ અગાઉ, કાલ સોમાણીની આગેવાનીવાળા ગ્રુપે 1.63 બિલિયન ડોલર (લગભગ 15300 કરોડ રૂપિયા) માં રાજસ્થાન રોયલ્સ ખરીદી હતી, પરંતુ RCB ની 1.8 બિલિયન ડોલરની ડીલે તે રેકોર્ડ પણ તોડી નાખ્યો છે.
RCB અને RR ની અબજો ડોલરની ક્લબમાં એન્ટ્રી
નોંધનીય છે કે, આખી દુનિયાના ક્રિકેટ ઈતિહાસમાં આ અત્યાર સુધીનું સૌથી મોટું વેચાણ છે. IPL ના ઈતિહાસમાં RCB અને RR એ બે જ એવી ટીમો બની છે જે 1 અબજ ડોલરથી વધુની કિંમતે વેચાઈ હોય. આ પહેલા વર્ષ 2022 માં સંજીવ ગોએન્કાએ લખનૌ સુપર જાયન્ટ્સ (LSG) ને 940 મિલિયન ડોલર (તે સમયના 7050 કરોડ રૂપિયા) માં ખરીદી હતી. એવું જાણવા મળ્યું છે કે આદિત્ય બિરલા ગ્રુપ અગાઉ રાજસ્થાન રોયલ્સ ખરીદવાની રેસમાં પણ હતું. પરંતુ ગયા અઠવાડિયે જ તેમણે RCB માટે વિજેતા બોલી લગાવીને બાજી મારી લીધી હતી.
18 વર્ષમાં ટીમની વેલ્યુ 16 ગણી વધી ગઈ
હવે આ નવું ગ્રુપ ડ્રિંક્સ કંપની ‘ડિયાજીઓ’ (જેની પેટાકંપની યુનાઈટેડ સ્પિરિટ્સ છે) નું સ્થાન લેશે, જે અત્યાર સુધી RCB ની માલિકી ધરાવતી હતી. વર્ષ 2008 માં જ્યારે IPL ની પહેલી સિઝન શરૂ થઈ ત્યારે RCB ને 11.6 મિલિયન ડોલર (તે સમયના વિનિમય દર મુજબ 446 કરોડ રૂપિયા) માં ખરીદવામાં આવી હતી અને તે બીજી સૌથી મોંઘી ટીમ હતી. આજે 18 વર્ષ પછી આ ડીલ સાબિત કરે છે કે ટીમની કિંમતમાં 16 ગણો જંગી વધારો થયો છે.
2026 ની સિઝન બાદ સંભાળશે સંપૂર્ણ વહીવટ
જોકે બિરલા પરિવાર દ્વારા કોઈ સ્પોર્ટ્સ ટીમ ખરીદવાનો આ પહેલો કિસ્સો છે, પરંતુ તેમની સાથે જોડાયેલા અમેરિકન ઉદ્યોગપતિ ડેવિડ બ્લિટ્ઝર રમતગમત ક્ષેત્રે બહુ મોટું નામ છે. તેઓ NBA, NHL અને ઈંગ્લિશ પ્રીમિયર લીગ (EPL) જેવી લીગની ઘણી વિદેશી ટીમોમાં પહેલેથી જ મોટો હિસ્સો ધરાવે છે. એવી અપેક્ષા છે કે આ નવું માલિકી જૂથ 2026 ની IPL સિઝન પૂરી થયા પછી ફ્રેન્ચાઇઝીનો સંપૂર્ણ વહીવટ પોતાના હાથમાં લેશે. IPL ની 19મી સિઝન 28 માર્ચથી 31 મે સુધી રમાવાની છે, જ્યાં 2025 માં પહેલી વાર ટ્રોફી જીતનાર RCB પોતાનું ટાઈટલ બચાવવાના મજબૂત ઈરાદા સાથે મેદાનમાં ઉતરશે.
Join Gurjarbhoomi Group & get Daily Updates, News & Many more…
ગુર્જરભૂમિ ન્યૂઝપેપરની ફ્રી ઈ-કોપી રેગ્યુલર મેળવવા નીચે આપેલ લીંક પર ક્લિક કરો અને જોડાઓ ગુર્જરભૂમિના whatsapp કમ્યુનિટીમાં અને દરરોજ મેળવો તાજા સમાચાર અને બીજું ઘણું બધું https://chat.whatsapp.com/JBcuZPbs8c13mKBrrfFfga
For more details… Contact 9322529232 / 9324483455
