કાંદિવલી સોસાયટીમાં સામે આવી ચોંકાવનારી ઘટના
વર્તમાન સમયમાં લોકોમાં સહનશક્તિ ઘટતી જતી હોય તેવું લાગી રહ્યું છે. નાની નાની વાતોમાં ઝઘડો થઈ જાય છે. કેટલીક વાર તો નાનો ઝઘડો ઉગ્ર સ્વરૂપ લઈ લે છે ને કેટલાક લોકો તો આવામાં ગુનો પણ કરી બેસે છે. આવી જ એક ઘટના સામે આવી છે મુંબઈમાં. અહીં કાંદિવલી સોસાયટીમાં 2 પાડોશી વચ્ચે પાર્કિંગ બાબતે ઝઘડો થયો ને તેનું પરિણામ આવ્યું મોત. શું છે સમગ્ર મામલો જોઈએ આ અહેવાલમાં.
માયાનગરી મુંબઈમાં ફરી એક વાર ચોંકાવનારી ઘટના સામે આવી છે. મુંબઈ જેવા વ્યસ્ત શહેરમાં જ્યાં લોકોને એકબીજા સાથે વાત કરવાનો પણ સમય નથી. તેમ છતાં અહીં અનેક એવા ગુના સામે આવે છે, જેને સાંભળીને લોકો ચોંકી ઊઠે છે. આવી જ એક ઘટના બની છે મુંબઈની કાંદિવલી સોસાયટીમાં. અહીં 2 પાડોશી વચ્ચે પાર્કિંગ બાબતે થયેલા ઝઘડાએ એટલું ઉગ્ર સ્વરૂપ ધારણ કર્યું કે, તેના કારણે એક વ્યક્તિનું મોત થયું હતું.
પાર્કિંગ બાબતે થઈ બોલાચાલી
સાંજે 6 વાગ્યાની આસપાસ મૃતક બોરાડે સિક્યોરિટી ગાર્ડ સાથે થયેલા ઝઘડા અંગે જાણવા માટે પાટીલ પાસે ગયા હતા. તે દરમિયાન બંને વચ્ચે બોલાચાલી થઈ હતી. વાત એટલી વધી કે, બોરાડેએ પોતાનો જીવ ગુમાવવો પડ્યો હતો. આ અંગે મૃતકના પત્ની આશાએ પોલીસને જણાવ્યું હતું કે, તેમના પતિને માર મારી ધક્કો મારતા તેઓ પડી ગયા હતા. જોકે, ત્યારબાદ મૃતક બોરાડેએ મદદ માટે 100 નંબર પર ફોન કર્યો હતો, પરંતુ તે જ દરમિયાન તેઓ જમીન પર ઢળી પડ્યા હતા. ત્યારબાદ આશાએ તાત્કાલિક તેમના પુત્રને બોલાવ્યો હતો. જોકે, ઘટનાસ્થળે પહોંચેલી પોલીસ બોરાડેને તાત્કાલિક કાંદિવલીની ઓસ્કાર હોસ્પિટલ લઈ ગઈ હતી, જ્યાં તેમને સારવાર દરમિયાન તેમનું મૃત્યુ થયું હતું.
પોલીસે પાટીલની કરી ધરપકડ
મળતી માહિતી અનુસાર, પોલીસે 68 વર્ષીય મૃતક સુભાષ બોરાડેના પાડોશી રાજેશ પાટીલની ધરપકડ કરી હતી. પોલીસે આરોપી સામે હત્યાનો કેસ નોંધ્યો હતો. મૃતક બોરાડે અહીં પત્ની આશા અને પુત્રો સાથે રહેતા હતા. તેઓ સિવિલ હોસ્પિટલમાં ડોક્ટર હતા. જોકે, આ દંપતીએ તેમની જ બિલ્ડીંગમાં તેમના ફ્લેટ કૂરિયર કંપનીને ભાડે આપ્યા હતા, જ્યારે પાટીલ પોતાનો બિઝનેસ સંભાળે છે. પોલીસ ફરિયાદ અનુસાર, પાટીલ અને કુરિયર કંપની દ્વારા નિયુક્ત સિક્યોરિટી ગાર્ડ વચ્ચે કંપનીના વાહનોના પાર્કિંગના સંબંધમાં ઝઘડો થયો હતો. એટલે સિક્યોરિટી ગાર્ડ આ મામલે ચારકોપ પોલીસ સ્ટેશનમાં ફરિયાદ નોંધાવી પરત આવ્યો હતો. જોકે, તે સમયે મૃતક બોરાડે અહીં હાજર નહતા. સિક્યોરિટી ગાર્ડ પરત આવ્યો ત્યારબાદ મૃતક બોરાડે તેમની સાથે ફરી એક વાર પોલીસ સ્ટેશન ગયા હતા.
પહેલાં પણ આવી રીતે થયો હતો ઝઘડો
આ અંગે ચારકોપ પોલીસ સ્ટેશનના સિનિયર ઇન્સ્પેક્ટર મનોહર શિન્દેએ જણાવ્યું હતું કે, અમે આશાબેનની ફરિયાદ મુજબ પોસ્ટમોર્ટમ રિપોર્ટની રાહ જોઈ રહ્યા છીએ. જોકે, અમે પાટીલની ધરપકડ કરી લીધી છે. મૃતકના પત્નીએ પોલીસને જણાવ્યું હતું કે, પાટીલ પહેલાં પણ તેમના પતિ સાથે ઝઘડો કરી ચૂક્યો છે.
ગુર્જરભૂમિની ફ્રી ઈ-કોપી દર રવિવારે રેગ્યુલર મેળવવા નીચે આપેલ લીંક પર ક્લિક કરો અને જોડાઓ ગુર્જરભૂમિના whatsapp ગ્રુપમાં. Join Gurjarbhoomi’s what’s app group for regular updates by clicking d link given below… https://chat.whatsapp.com/IXcUoVk6Gzl8s63Vth5t0w
